ഗൽവാനിലെ രക്തപുഷ്പങ്ങൾ - സിബി പയ്യാവൂർ

പോരിൽ മരിച്ചവൻ ധീരനാം സൈനികൻ
നാടിന്നഭിമാനമായവനെങ്കിലും
തെല്ലൊരു നൊമ്പരമുള്ളിലുണ്ടിന്നെൻ
മരണമൊരാഘോഷമായതു കാണവേ...

എൻ നാടിനായി ഞാനർപ്പിച്ച ജീവ-
ന്നവകാശിയാകുവാൻ പോരടിപ്പൂ  ചിലർ
സാമൂഹ്യ മാധ്യമത്താളുകൾക്കുള്ളിലെൻ
രക്തസാക്ഷിത്വമാഘോഷമായ് മാറ്റിയോർ

ചിന്തിപ്പു നീയിന്നൊരു നിമിഷത്തേക്കു
ചിന്തിയ താർക്കുവേണ്ടി ച്ചുടു ചോര ഞാൻ
രാഷ്ട്രത്തിനായ് ഞാൻ സമർപ്പിച്ചതാമെൻ്റെ
ജീവൻ്റെ പേരിനായ് മൽസരിക്കുന്നിവർ

എൻ മാതൃരാജ്യമെന്നൊറ്റ വികാരമേ-
യുള്ളെൻ സിര തന്നിലോടിയ രക്തത്തിൽ
ഇല്ലാ വിഭാഗീയ ചിന്തകളൊന്നുമേ-
യില്ലിന്നവസാന തുള്ളി ചിന്തും വരേ

നഷ്ടങ്ങളില്ലിന്നു നിങ്ങളിലാർക്കുമി-
ന്നെൻ പൊന്നുമക്കള നാഥരായ് തീർന്നു പോയ്
ഏറെ ദുഖത്താലെരിയുന്നവർക്കു തെ-
ല്ലാശ്വാസമേകുവാ നില്ലിവിടാരുമേ

തെല്ലു ദിനങ്ങൾ കഴിഞ്ഞു പോയീടുകിൽ
ചൂടാറുമെൻ ജീവ ത്യാഗത്തിൻ ചർച്ചകൾ
പിന്നെ പതിയേ മറന്നിടും നിങ്ങളെൻ
ജീവത്യാഗത്തിന്നുദാത്തമാം കാരണം

ശത്രുവുമായി നീ സന്ധി ചെയ്തീടുന്നൊ-
രാ നിമിഷത്തിൽ മരിക്കുമെന്നോർമകൾ
അന്നുമെൻ മക്കളനാഥരായീത്തെരു-
വോരത്തു നിന്നു കേഴും നീതി നേടുവാൻ

എങ്കിലുമെൻ പ്രിയ സോദരർ നിങ്ങളോ-
ടുണ്ടെനിക്കിന്നൊരു കാര്യമോർപ്പിക്കുവാൻ
നിൻ രാജ്യസ്നേഹം പ്രകടമാക്കീടുവാൻ
മാധ്യമത്തേക്കാൾ മഹത്തരം ജീവിതം...