വിടരാനനുവദിക്കാതെ....
തല്ലിക്കൊഴിക്കപ്പെടുകയായിരുന്നു നീ.
സംരക്ഷണം നൽകേണ്ടവരുടെ നിസ്സംഗതയിൽ.....
പൊലിയപ്പെടാനായിരുന്നു നിന്റെ വിധി.
വാർത്താ മൂല്യത്തിന്റെ കുറേ..
മണിക്കൂറുകൾക്കപ്പുറം,
നീയും ഒരു പഴങ്കഥയാവാം...
നമുക്കുറക്കം നടിച്ചു കഴിയാം...
വീണ്ടും ഷഹ്‌ലമാർ സൃഷ്ടിക്കപ്പെടും വരെ...
എന്റേതല്ലാത്തിടത്തോളം
എനിക്കെന്ത്....
നിന്റേതല്ലാത്തിടത്തോളം
നിനക്കെന്ത്.....
പ്രതീക്ഷ ഒന്നു മാത്രം...
ഉള്ളിൽ തീയെരിയുന്ന കുരുന്നുകളുടെ
ചെറു പ്രതികരണങ്ങൾ...
നമുക്കതും കണ്ടില്ലെന്നു നടിക്കാം...
പക്വതയില്ലാത്തവരുടെ ജൽപനങ്ങൾക്ക്..
നാമെന്തിനു ചെവികൊടുക്കണം.
നമുക്കുറങ്ങാം സ്വസ്ഥമായി....
ഈ കുരുന്നുകളാൽ ഒരു നാൾ
തെരുവിൽ വിചാരണ ചെയ്യപ്പെടും വരെ...
അന്നും നമുക്കവരെ വിധിക്കണം
ഗുരുത്വമില്ലാത്തവർ എന്ന്.
